ՀԲԸ Միութեան Միջին Արեւելքի մասնաճիւղերու ներկայացուցիչներու համաժողով մը տեղի ունեցաւ 17-19 Մարտ 2022-ին, Պէյրութի մէջ, որուն ներկայ եղան ՀԲԸՄի Կեդրոնական ժողովի անդամներ եւ Միութեանս նախագահ տիար Պերճ Սեդրակեան:
Այս համաժողովին կը մասնակցէին Սուրիոյ, Լիբանանի, Պարսկաստանի, Կիպրոսի, Եգիպտոսի, Յունաստանի, Իրաքի եւ Յորդանանի շրջանայիններու ղեկավար մարմիններէն ներկայացուցիչներ:
Եգիպտոսէն մասնակցած էին ՀԲԸՄի Գահիրէի մասնաճիւղի ատենապետ Տոքթ. Վիգէն Ճիզմէճեան, ՀՄԸՄ ՆՈՒՊԱՐ մարզական միութեան ատենապետ Տոքթ. Հրայր Տրդատեան եւ Տոքթ. Գէորգ Երզնկացեան՝ ՀԲԸՄ Եգիպտոսի վարչութեան անդամ։
Համաժողովը նպատակ ունէր համադրել անցնող ծանր եւ տագնապալից շրջանի Միութեան աշխատանքները եւ ապագայի ծրագիրներուն շուրջ միասնաբար խորհրդակցութիւններ վարել: Շեշտը դրուած էր ապագայի գործունէութեան վրայ, գրեթէ զանց առնելով տեղեկագիրներու ընթերցումը:
