ՀԲԸՄ-ի Եգիպտոսի Շրջանակային Յանձնաժողովին եւ եւ Գահիրէի մասնաճիւղին պատուոյ ատենապետ, եգիպտահայ մտաւորական Պերճ Թէրզեանի հեղինակութեամբ վերջերս լոյս տեսած այս գիրքը աւելի կանուխ պէտք էր հրատարակուէր, ինչպէս յիշուած է առաջին էջին վրայ.
«Ներկայ հրատարակութիւնը ծրագրուած էր լոյս ընծայել 2019-ի վերջին քառորդին, սակայն հեղինակին հիւանդութեան եւ այլ թէքնիք պատճառներով, հրատարակութիւնը կարելի եղաւ միայն 2020-ի առաջին քառորդին»:
Գիրքը քսան տարուան հեռաւորութենէ մը կ’անդրադառնայ Հայաստան-Սփիւռք Ա. համաժողովին բաւական լայնածաւալ կերպով եւ մէկ կողքի տակ կը խմբէ այն բոլոր իրողութիւնները, մանրամասնութիւններն ու չիրականացած ակնկալութիւնները, որոնք կ’առնչուին մասնաւորաբար այս համաժողովին:
Հեղինակը ինք կը յստակացնէ ըսելով.
«Հակառակ անոր որ ներկայ հրատարակութիւնը ենթադրուած է Հայաստան-Սփիւռք Ա. համաժողովին մասին խօսիլ, կարգ մը հարցերու լուսաբանութեան համար հարկ եղած է խօսիլ Ա. համաժողովին յաջորդող հինգ նման հաւաքներու մասին եւս, մինչեւ Հայաստան-Սփիւռք վեցերորդ Համաժողովը»[1]:
Այստեղ կը գտնենք քանի մը հեղինակաւոր անձերու ելոյթները նաեւ, ինչպէս Մեծի Տանն Կիլիկիոյ Կաթողիկոս Արամ Ա.ի, ֆրանսահայ մտաւորական Պետրոս Թերզեանի խօսքերը եւ եգիպտահայ մտաւորական տոքթ. Սուրէն Պայրամեանի զեկոյցը:
Հարիւր էջեր հաշուող գիրքը կը բաղկանայ մուտքէ մը, վերջին՝ «Դէպի Վերականգնում» բաժինէն եւ ասոնց միջեւ գտնուող տասը գլուխներէ:
Ներկայ գիրքը հեղինակին 2008 թուականէն մինչեւ օրս լոյս ընծայած գիրքերուն եւ գրքոյկներուն շարքին տասնչորրորդն է, որ կարելի չէ դժբախտաբար Եգիպտոսէն դուրս առաքել տակաւին, պսակաձեւ ժահրին պարտադրած առաքումներու անկարելիութեան պատճառով:
